Luk 8 | GAM | STEP | Are Jisas po una merke dumo moi al ne, una merke namoi al po wane, God dumoye kantau yendo mal dje una awi. Yene kogoye una 12-pela une boll aike wanmaka,

Luke 8

Ana pende Jisas boll aike wani

1 Are Jisas po una merke dumo moi al ne, una merke namoi al po wane, God dumoye kantau yendo mal dje una awi. Yene kogoye una 12-pela une boll aike wanmaka, 2 ana pende kambono ge boll aike wani. Ana pende kum ke Satan dje wori wo tukne al moi Jisas wo i wori ana ne, ke kayekaye pai ana ge Jisas po i gun woro awi. Dumo Magdala ana Maria we dji moi ge Jisas asa po kum ke 7-pela Satan dje wori wo tukye al moi ge i wori ana. 3 Ta Erot boiye iwa kerman Susa game gama Joana ge moi. Ta ana Susana ne, ana merke molo Jisas ne, kogoye una wal nayei ge, ana kambono yenekne ku ne, wal iwo kambono awo embe ye wani.

Iwa ta mauye al wal megye pup to wori

(Matyu 13.1-9 ne, Mak 4.1-9)

4 Una merke dumo yemyem pai ge, Jisas moi al womaka, Jisas kandja buko ta dje awo embe dji, 5 iwa ta er mauye al po wal megye pup to wori. Pi al ge kondwe pende yagi. Una wo kamblo kal wormaka, ka wo no keri. 6 Pende yage ku al toi ba, makimb nuye namoi. Gup yeno dje yei ge man pai, golo er kal pi. 7 Megye pende yage ka kagle moi al pakna pi. Gup ye pla woi ba, ka kagle tublo i gulo wori. 8 Alla megye pende yage makimb wopake yei al toi. Gup yeika megye wan andret (100), wan andret (100) dje toi. Jisas embe dje kere yau to embe dji, ye kamallne paro, kandja ge pillme! dji.

Jisas nomane pai mal pille kandja buko dji

(Matyu 13.10-17 ne, Mak 4.10-12)

9 Jisas kandja embe djika, yene kogoye una wo embe dji, ni kandja buko djinden ge me namba mal paro ne? dji. 10 Djimaka Jisas embe dji, God dumoye kantau yendo ge, kandja seke paro mal, ye pille ine dje pille God ye ombine dje aundo. Ba una mor ge na kandja embe dje naundo, na kandja buko eri dje aundo. Na embe yendo ge kambono kane imbon dje yene ge, man panda; kandja pupon dje yene ge, man panda we dji.

Wal megye pup to wori mal kandja me embe paro

(Matyu 13.18-23 ne, Mak 4.13-20)

11 Jisas embe dje awi, kandja buko me ge embe mal paro. Wal yai ge God kandjiye yai. 12 Wal megye yage kondwe toi ge embe mal paro. God kandja dje awi una tukne al yaya ge, Satan kane wo i worda; kambono pillgi djimbon dje yene ge, man panda, God i yem naworda. 13 Wal megye yage ku pai al toi ge embe mal. Una God kandjiye wopake pille ine ba, kandja ge djimbe naworda. Yepall ta moyeke, are wal ta wo kamalne tondaka, pillgi djine ge kerne. 14 Wal megye yage ka kagle moi al toi ge embe mal paro. Una God kandjiye piye ba, makimb wal nomane merke pandaka, dje mogoi pille we ye, wal i nambon dje pille, God kandjiye yaye ba tublo i gulo worda, megye natonda. 15 Wal megye yage makimb wopake yei al toi ge embe mal paro. Una God kandjiye pillgi djineke, nomane wopake panda moye una ge, God kandjiye pille yayeke megye tonda we dji.

Wamo lambo kandja buko dji

(Mak 4.21-25)

16 Jisas embe dji, una wamo lambo gale ipo sin paknato napagye, man. Lambo gale ipo bo mename napagye eri. Una wamo lambo gale ipo bo al pla woro yene ge, do au djindaka una numog wone ge kanne. 17 Wal seke paro ge are er pene wondaka, wal una nakaninj ge are kanne. 18 Na kandja djindo ge ye pillpol to molme! Una wal ta pandaka God wal aunda. Ba alla, una wal ta napandaka, wal kembis ta paro dje kanne ge God i worda we dji.

Jisas me ne, age kambono une moi al woi

(Matyu 12.46-50 ne, Mak 3.31-35)

19 Kune ge Jisas me ne, age kambono boll une kanbon dje woi ba, una merke molmaka, dumo sill dji, kambono Jisas kanne napai. 20 Una pende Jisas moi al wo embe dji, ni man ne, agan kambono ni kanbon dje woi, bekle to mor we dji. 21 Ba Jisas embe dji, God kandja djindo mal una pille kane yenj una mor ge, na mana ne, agana mor we dji.

Kam kopo kerman woi ge Jisas djika alla nawoi

(Matyu 8.23-27 ne, Mak 4.35-41)

22 Ege ta yeika, Jisas kogoye una moi al wo embe dji, nono er nu erim konato bone dji. Djika kambono Jisas boll aike po kanu i er pi. 23 Pumaka Jisas ou pa moika, kam kopo kerman woi. Nu olup ye po wo yeika, nu er kanu al pakna po puka to moi; nu nane pai. 24 Kogoye una wo Jisas to mage embe dji, Iwa Kerman!, Iwa Kerman!, nono gopon manda yendo we dji. Djimaka Jisas agle kam kopo ne, nu kandja awo embe dji, ye olup yenmell ge kerse! dji. Embe djika kam kopo ne, nu olup kaima ta nayepill. 25 Jisas embe dje kogoye una awi, ye pillgi dji ge, er kond nam pi ne? dji. Dji ba kogoye una aya dje kand golo, yenekne kandja dje pille embe dji, une ge una ne mal kaima molo, kam kopo ne, nu boll kandja dji pirmell ne? dji.

Iwa ta kum pai ge Jisas wo i wori

(Matyu 8.28-34 ne, Mak 5.1-20)

26 Dje kerika kambono er nu erim djeke yemto po, una Gerasa makimbne al pi. 27 Po pillau djimaka, iwa ta kum ke tukye al moi ge Jisas moi al woi. Iwa ge kamasa midja nayai; bekle to wane, ku gona al una gull to to yei al, une po pa wo embe ye moi. Asa una ka sen kolo pagle kanmoi ba, kum ke tukye al moi ge kune merke to pruko dje woro embe yei. Kum ke iwa ge dje i bake bake una namoi al po wane yei. Iwa ge kane Jisas moi al wo kake al taimagaus pa moika, Jisas embe dji, ni kum ke moren ge kere er wo orko piye! dji. Djika, une yau kerman to embe dji, God pla kaima moro una wariye Jisas ni wonden ge, ni na namba ye auno dje pille wonden ne? Une ge kandja yembe ye dje embe dji, ni na ye ke ye nawe! dji. 30 Jisas embe dji, ni kandjin ne ne? dji. Une ge embe dji, na kandjina ami kambono we dji. Une kandja embe dji ge yene tukye al kum ke merke moi pille dji. 31 Kum ke iwa tukye al moi ge yembe ye dje embe dji, no kum ke merke mormon ge ni dje no tupa beye naparo al nawore! dji. 32 Dumo manda moi al ge kog pende merke tambale al molo em no molmaka, kum ke ge yembe ye dje embe dji, ni no dje worben pandaka, ni djimbenka no er kog tukne al pakna bon we dji. Jisas, kune, ye er pume! dji. 33 Djika kum ke una moi ge kere, er kog tukne al pakna pumaka, kog bul dje er dumo ke yei al kal po nu erim moi al, nu no golo keri. 34 Golo kermaka kog kantau moi una kane, muk dje seke er po dumo kerman kembis aike djimaka, 35 Jisas yei mal una pille kanbon dje woi. Kambono Jisas moi al wo kani, asa une ge kum ke tukye al moi, konkunom naye moi ba alla, ipon konkunom ye, nomane wopake paika, Jisas kake al ami dje moi, una wo kane kand goi. 36 Jisas wo kum ke i wori iwa kiwa moi mal kani una moi ge, kandjambe tomaka una are woi ge pi. 37 Distrik Gerasa una porapora kand kerman golo embe dji, Jisas, ni no makimbne al kere er tambye ta piye! dji. Djimaka Jisas alla er kanu al po pakna moika, 38 kum ke tukye al moi i wori iwa ge embe dji, Jisas, ni ben al na wono aike boll we dji ba, Jisas man dji. 39 God ni ye wopake ye awi mal ge, ni er yem po nenem numbin al dje awe! dji. Djika une yene dumoye al po Jisas wopake ye awi mal kandja dje awo moika una pi.

Jairus aboriye goi ge Jisas i gun woro awi. Alla, Ana ta wo Jisas konkunom woro pagi al abi

(Matyu 9.18-26 ne, Mak 5.21-43)

40 Una merke wo Jisas yem wonda dje pille makai to molmaka, Jisas alla nu erim yemto pika, una wo pille djembon to awi. 41 Lotu numb kogo yei iwa kerman ta Jairas we dji moi ge, une Jisas woi al manda wo kake gopye boglo awo embe dji, ni na numbna al womben we dji. 42 Une kandja embe dji ge, yene abore taimane ta moi ge kognumb 12-pela mal moika, ke toi ge goya yendo dje pille dji. Jisas une ge boll aike er pupillka, una merke aike dakalo dakalo ye pi. 43 Po kondwe tambye pumaka ana ta moi. Ana ge kognumb 12-pela paknato ge, gakle meyam to pa moi, una ye imbon dje yei, man pai. 44 Jisas woi al ana ge manda wo Jisas mopye al kon momo woro pagi ge abika, ola dje ke pai ge pora dji. 45 Djika Jisas embe dji, una ne mal na abro ne? dji. Una porapora man we djimaka, Pita embe dji, nono una merke mopin dakalo kaima paro, ni namba yei pille, una ta wo na abro we djinden ne? dji. 46 Jisas, man, na yembena dongall pai ge ta er orko pi pille djindo we dji. 47 Ana ge kani tormang yenda napai, una porapora kanmaka, une kake agle toika, wo Jisas kake al taimagaus pa moi. Yene nomane pai mal pille wo Jisas abi ge une dje pene woro, na ke toi pall ge kune taimane pora dji we dji. 48 Djika Jisas embe dji, abona, ni pillgi djin pille ni kein pai ge pora dji. Ni ellin tukin arngan yenda, wanmole! dji.

49 Jisas kandja embe dje moika, Jairas boiye iwa ta wo Jairas moi al embe dji, womba goi pora dji. Ni tisa kogo naumben! we dji. 50 Djimaka Jisas pille Jairas moi al embe dji, ni kand nagopen. Ni pillgi dje pa mopenka, womba kiwa moya we dji. 51 Djika er numb al pumaka, una numog wombon dje yei ge Jisas man dji. Iwa Pita ne, Jems ne, Jon ne, womba neme boll aike er numog bon we dji. 52 Dje moi al ge una kimb ye molo, kimb kallngane yemaka, Jisas embe dji, ye kimb nayeme! Womba nagoro, kiwa ou pa moro we dji. 53 Embe djika una moi ge, womba kaima goi dje kane, po ye Jisas awi. 54 Jisas po womba ge agle amblo yau to embe dji, aboya! Ni agle! dji. 55 Djika womba nomane alla wo paika, une ola dje agi. Jisas embe dji, ye kwa ta auneke womba ge nonda we dji. 56 Womba neme kane asall topill. Jisas embe dji, na wo embe yell, we nadjise! dji.